作為半個傳媒人，因工作關係，經常接觸不同的專欄作家，睇稿改稿催稿可謂家常便飯。夠膽講句，這個崗位絕對不是優差，尤其遇上以下十種令人討厭的寫手，更是苦不堪言。
一）遲稿。可謂死罪之首，眾所周知，做報紙分秒必爭，每朝均要準時出街，你一個人遲稿，全份報紙癱瘓，編輯美術印刷員工要加班，數以十萬計讀者同樣受罪。
二）狗屁不通。專欄見報之時字字珠璣，其實大部份已由採主或編輯改頭換面，部份所謂作家語文程度之低劣，連小學生也不如，面對如此情況，只能中文老師上身，當改學生作文。
三）搬字過紙。部份人士接job做宣傳機器，只將新聞稿copy and paste，隻字不漏，「香港聯合交易所有限公司」全名照出，甚麼先生、女士、太平紳士等稱謂也照寫如儀，果然係禮義之邦的典範。
四）字眼重複。見過最離譜的情況，連續五句句子，都有「仍然」兩個字，究竟係唔夠字數要硬撐，還是詞窮到一個點，至今「仍然」是一個謎。
五）我手寫我口。其實口語不是問題，但句句都係咁，就好有問題。事關有人講嘢，十句有八句都係廢話，七除八扣之後，分分鐘同條簡訊冇分別。
六）甩稿。這個情況較少，但不代表不會出現。試過截稿仍未見蹤影，查問之下，原來因為抱恙，但竟然零通知，試問你病咗返唔到工，會唔會唔打電話返公司請病假？
七）改完又改。我知你對文字好執着，務求做到完美，但每隔幾分鐘改一改，改甚麼？「的」改做「呀」，「但是」改做「不過」，好想帶你過大海一趟，話你知甚麼叫買定離手。
八）錯漏百出。最常出現在財經專欄，公司名、人名、職銜、股票編號、價位、純利、派息，所有嘢都可以錯，如果把關不力出咗街，我又要硬食，所以千錯萬錯，搵你寫專欄可能係最錯。
九）字數過多或不夠。前者還可以，大刀闊斧咁刪，只要保持內容完整性便行。後者嘛，幫你加字不是問題，但你出稿費時可否分番畀我？
十）不聽電話。遇見第二點（狗屁不通）及第八點（錯漏百出），用盡辦法都未能成功修改，只能找你求證。但你的手提電話，一係長響一係唔通，唔知以為自己打錯演唱會訂飛熱線。
P.S.相信令人討厭的寫手，肯定不止以上十種，但最討厭的是，一個寫手可以同時擁有以上特質！
毛倫次
編者按：周光暉事忙 《暉灑自如》暫停一周