韓國女星宋智孝、古天樂和楊千嬅等昨晚到銅鑼灣出席某韓國太陽眼鏡品牌旗艦店開幕，吸引大批粉絲圍觀。古仔在暑假有5部戲包括《三人行》、《使徒行者》等上映，出現自己打自己場面，問到會否擔心拉低票房？古仔笑說：「希望拉低奧運，至於朋友就拉低褲頭睇晒5部戲。」
昨日天氣酷熱，古仔開工拍陳木勝的新戲《喵星人》，有工作人員中暑要報警，他說：「自己都好攰，好在冇事。」昨日首次跟智孝見面，問覺得對方吸引嗎？古仔說：「佢出咗名唔使化妝，至於有冇機會合作，我哋做演員好被動。」
嫌柏霖唔夠Man
智孝用廣東話打招呼：「大家好，我係智孝。」之前她跟陳柏霖合演真人騷《我們相愛吧》而變好友，問到兩人是否仍有聯絡？她透過繙譯說：「拍完後還有聯絡，早前去上海都有見面問候。」有否發展機會？她笑說：「自己都有一定年紀，想找又體貼又man的男人，擁抱自己大力點。」問到會否再拍真人騷？她說：「只要能讓大家見到新面貌，都會作新嘗試。」
笑囝囝似女人
千嬅則表示只在電視見過智孝，並透露自己最近都接了真人騷：「𠵱家好多真人騷買韓國版權，自己都有留意佢哋嘅節目，好似《Running Man》真係堅running，阿仔都有睇BIGBANG，成日唱佢哋嘅歌，老公都話唔好畀佢接觸咁多兒歌，聽多啲流行歌，唔好咁裙腳，所以佢都有接觸K-pop，有日見到佢喺屋企扭，成個女人咁，𠵱家我都盡量播郭富城畀佢睇。」那麼有否播丁子高所屬舊組合VRF的MV給囝囝看？千嬅笑說：「佢哋係四人組合，都唔認得邊個打邊個，而且佢個樣已經面目全非，反而許志安好正，尤其件衫可以留30年，仲好弗㖭。」
採訪：張俊銘
攝影：陳俊強
