港超嘅香港飛馬原先準備同總領隊奇雲邦特續約，但佢決定喺英冠阿士東維拉發展，不過都幫飛馬搵咗前昆士柏流浪（QPR）一隊教練Steve Gallen做主教練，雙方簽約一年。飛馬喺上季尾搵咗教過熱刺等英超會嘅奇雲邦特做總領隊，即刻連奪足總盃同菁英盃，而佢就大力推薦喺QPR合作過、42歲嘅Steve Gallen畀飛馬。喺QPR做咗19年嘅Gallen曾經發掘過史達寧，照睇履歷就唔錯，而飛馬稍後就會公佈來季組軍消息。