金管局副總裁阮國恒在金管局嘅網誌「匯思」（6月17日）撰文指本港中小企及初創企業在銀行開戶口不容易，據調查所知，平均約有10%開戶申請被銀行拒絕。「信報」（6月18日）報導：「他稱，金管局要求銀行在設計和實行客戶盡職審查措施時，採取『風險為本』做法，但不應該『一刀切』，而是要因應不同類別的客戶、交易或服務的風險差異，合理地區分風險。他強調，『風險為本』絕非『零風險』，即是說銀行不應矯枉過正，試圖排除所有客戶可能涉及不當行為的風險。」
一位賓架早上睇完呢段新聞，幾乎連杯伯爵茶都飲唔落，指神又係佢，鬼又係佢，今日銀行之嚴格要求客戶提供開戶口之金錢來源證明及背景資料，皆源於金管局之KYC及AML之要求，審查時漏咗些少資料，都會被金管局阮國恒所主持嘅部門抽秤到暈。一喲賓架就曾被阮先生手下召見過，滋味並不好受。勢估唔到，阮先生會指導銀行：「風險為本」絕非「零風險」，真係官字兩個口嘅典型。香港嘅按揭貸款，歷來風險甚低，呆賬撥備遠遠低於中小企信貸，有大量歷史數據做證明，但金管局對按揭貸款極嚴格限制，為換樓中產構成障礙，目的為何？為政治目的服務而已，特首話要用辣招，金管局點敢唔配合埋一份？
除咗KYC、AML之外，還有一個名詞叫做PEP，校友H就係其中一位，佢話佢係全國政協委員，自然係一位PEP （Politically Exposed Person），於是受到銀行特別關注，好多年前佢未成名之時，在太太服務嘅銀行開咗一個理財戶口，貪方便而已，依家就成為「不方便」，因為銀行一為「利益衝突」，二為「PEP」對佢將戶口啲錢移入移出睇到實，不時詢問，令佢不勝其煩，想話將戶口搬去老友記賓架S嘅銀行，熟朋友都係咁話，賓架S對校友H講：「唔好攪我嘞，你係PEP，零舍麻煩，我地對新戶口要問好多嘢，一定令你唔高興，無謂啦！」校友H未有作罷，想搞特事特辦呀，銀行冇呢支歌唱。又有校友C在一個美資行私人銀行部門開戶口二十幾年，最近美資行出售PB業務，由歐資行購入，原本以為轉過一間銀行箒，點知歐資行要求不少美資行舊戶口填報全新資料，追查戶口資金來源，校友C為之媽媽聲，因為歐資行要索取證明佢戶口內點解有咁多錢也，你估歐資行嫌戶口多要趕客乎，非也，無非為咗應付金管局及英美歐盟監管之要求而已。阮國恒還要講風涼話，賓架梗係吹脹啦。