今時今日，肯定唔只少女或者阿媽先至煲韓劇，男人為咗做生意，要知道邊位韓星夠人氣，都要煲埋一份，賣化妝品嘅莎莎國際（178）老闆郭少明就係其一。近年多人幫襯莎莎買韓國產品，佢都要煲番一兩套韓劇。
家陣隨便走入去莎莎嘅舖頭，就會發現大量韓國牌子嘅mask同護膚品。郭少明噚日喺業績會上竟然話，最初其實唔睇好韓國產品，估唔到韓風能夠越吹越勁，「有韓星做嘜頭嘅面膜真係好好賣。」
「乜太陽吖嘛，有睇」
要分辨韓星嘅嘜頭，最快靚正嘅做法咪就係煲韓劇囉。郭少明自爆︰「我梗係有睇韓劇喇！」佢仲嫌太太郭羅桂珍睇得慢，唔同老婆一齊睇，各有各睇㖭呀，幾大膽呀！
問佢最近興睇邊套，佢即刻笑住答︰「唔係星星的你啦，係乜太陽吖嘛，我有睇。」查實《太陽的後裔》都「興」完一段時間，不過唔緊要，難得郭少明62歲仍然有心追上年輕人潮流，即使佢講到啲、講唔到啲，份誠意都值得畀個like佢。
睇番莎莎份業績，裏面提到韓國產品舊年喺港澳嘅銷售升近26%，升幅咁靚，唔怪得要大力做啦。郭少明都話，韓國貨「上落快」（去貨快），佢估計，韓國產品仲會有一排興㖭。
李華華
mailto:[email protected]