無綫前御用「被強姦受害人」石天欣，早前在微博撐何韻詩的Lancôme風波與內地網民開火，她被鬧爆醜樣、奀星博出位等。天欣無懼被封殺，堅決不做「偽人」，寧願打多幾份兼職養家，她說：「我又唔覺香港好難搵食，我唔係一定要做死呢一行，總之生存到，錢夠生計就OK。」
撰文：嵐山
石天欣的敢言，有人覺得她是博出位，有人擔心她未來演藝路難行，但性格樂天的天欣卻從沒擔心過。因為除演員以外，她一直以來都身兼數職，早前已被發現到迪士尼扮美國村姑sell客執貨𠱁細路。
日前本報更直擊她到太古一棟商廈做遊戲場指導員的工作流程，見她在泡泡足球場中走來走去扶起跌低的人，好幾次差些被泡泡足球撞倒，險象環生。散場之後，天欣又幫手清理垃圾，難得空閒才與拍檔對玩射箭，認真是work hard play hard。
曾扮海洋公園嘩鬼
天欣透露最高紀錄曾同一時間打四份工，曾做過電話訪問員、Instagram shop、整手機殼、泡泡足球場、迪士尼售貨員、海洋公園扮嘩鬼、promoter、公關等，天欣直認有家庭負擔：「好多人睇我Ig覺得我成日去玩，去完歐洲、美國，又去昆士蘭，但其實我一直做好多份part time，大部份賺番嚟嘅錢都畀晒屋企做家用，用剩先儲起嚟去窮遊，平時好慳，乜都唔買。」搵食艱難？她說：「又唔覺，我唔係一定要做死呢一行，總之生存到，錢夠生計就OK。」為何可以放下藝人身份去打工？她說：「我怕悶，以前返TVB係一份正職，有少少空餘時間就去搵part time。最多人講嘅係『覺得你好熟口面』，我咪話可能我哋見過。」
「寧願真係賺少啲」
對於被網民鬧博出位，天欣反駁說：「應該可能出到少少位，但唔會係好囉，唔會突然多咗好多嘢做。」是否退出娛樂圈？她說：「一半半啦，好難講係咪退出，因為間唔中都有做；但將來會唔會完全退出，我唔排除。」
最近銅鑼灣店長林榮基爆李波是非自願返內地，天欣在雨傘運動期間，曾遭當時的經理人禁聲，她亦覺香港言論自由越來越窄：「呢一、兩年有呢個問題，無論邊方面，政治乜都好。人要跟自己個心去做，我以前試過聽佢（前經理人）話，但自己個心唔好過，唔開心，我有一排都好struggle（掙扎），但後來覺得唔好囉，我寧願真係賺少啲錢，但係開心啲。」
場地：CROSSFIRE ARENA
老闆讚工作態度好
做藝人好被動，不常有工開，有時真要望天打卦。90後、現年23歲的石天欣（Tina）不想浪費青春，寧願做多幾份兼職打工。天欣的學歷雖然不高，但能說一口流利英語和普通話，遊戲場的老闆Adwin年幾前便看中天欣開朗活潑個性，邀請她做opening promoter，之後還請她做遊戲指導員，Adwin說：「佢工作態度好好，欣賞Tina性格開朗，好多小朋友都鍾意同佢玩。」
不過，天欣的敢言，致演藝工作危危乎，Adwin說：「呢方面我哋OK，因為要多同客溝通嘛。而且我冇權去控制人哋，我都贊成佢某啲言論。」
