香港浸會大學室樂合唱團「Cantoria Hong Kong」（圖），再次衝出香港積極發聲，6月初到咗英國倫敦喺著名大學獻唱，仲獲邀喺英國廣播公司嘅電台節目《In Tune》即場演出，認真巴閉！
原來合唱團喺劍橋大學，同帝皇學院嘅合唱團演出之外，仲到咗皇后學院嘅校長寓所獻唱，團員亦同倫敦大學皇家霍洛威學院嘅合唱團，以及喺倫敦同National Youth Choir of Great Britain Fellowship Octet聯合演出，似乎訪英之行都有好多知音人。
室樂合唱團指揮、音樂系副教授文盛伯博士話呀，團員此行有機會同三個世界級合唱團合作，難能可貴；而喺英國廣播公司10萬名聽眾收聽嘅30分鐘現場演出，團員要高度集中，係好寶貴嘅經驗。