維他奶（345）噚日開業績會，會上唔見咗熟口熟面嘅首席財務總監（CFO）馮潔儀，換咗位生面口、高高大大嘅男子傍住執行主席羅友禮，經主持介紹先知原來公司喺今年4月，低調換咗呢位叫劉健成嘅男子做CFO。
其實一般公司換高層，都會喺聯交所出通告，等股民了解新管理層背景，但劉健成上任前後都好似冇乜介紹。問羅友禮點解揀中劉健成，佢就笑笑口咁話，係經過遴選，正常程序搵到佢，講到冇乜特別咁樣。
睇番資料，劉健成上任兩個幾月，但噚日已經被安排應付傳媒，而且都算熟書，表現淡定嘅。公司冇講太多有關劉健成嘅背景，只係話佢之前喺亞太區同美國多間跨國公司任職，喺財務管理有30年經驗，想八卦多啲佢之前做過邊間公司，公司就話冇補充喇，點解咁神秘嘅。