見到決賽又要鬥智利，唔知美斯個心會唔會離一離？禮拜三美洲盃四強，智利以2:0淘汰哥倫比亞，將會同阿根廷重演舊年美洲盃決賽翻版。上年智利互射12碼搞掂阿根廷，令美斯封王夢碎，唔知今年係智利繼續做剋星，定係美斯復仇成功？
半場落大雨延誤三粒鐘
智利喺呢場四強入局快，殺哥倫比亞一個措手不及！智利七分鐘就由艾蘭古斯開紀錄，四分鐘後富恩沙利達入多球，幫智利拉開到2:0。雖然智利呢場有維達爾停賽，但整體踢得好好，半場維持兩球優勢；中場休息嗰陣，芝加哥突然風雲色變，落起狂風大雨，球證下半場要延遲開波。大雨停咗之後，主辦單位派咗好多工作人員落場清理積水，搞咗差唔多三粒鐘先至重開。換邊後，哥倫比亞仲有中場山齊士摩蘭奴喺57分鐘領第二面黃牌被逐，無法平反敗局，智利輕勝2:0晉級，決賽會同阿根廷爭冠軍（now650台下周一8:00am直播）。智利教練派斯賽後話：「中場嘅風暴令人幾唔舒服，尤其我哋要屈喺更衣室入面成三粒鐘，好在球員出番嚟都保持專注，哥迪奧巴禾又救到幾球波，我哋先可以入決賽。」
阿根廷折天使缺拿維斯
上屆美洲盃決賽，又係智利同阿根廷鬥，120分鐘踢成0:0，智利射贏12碼捧盃，搞到美斯連續兩年入大賽決賽都拎唔到冠軍！今年分組賽又同組，阿根廷贏2:1，決賽又對智利，唔知美斯同阿根廷會唔會有陰影？阿根廷踢到決賽其實都殘殘地，迪馬利亞分組賽受傷，雖然冇退隊但未必踢到決賽，四強又有拿維斯、奧古士圖費南迪斯同馬高斯盧祖受傷，其中拿維斯手踭受傷要做手術，肯定踢唔到決賽。講到決賽，派斯就話係五五波，「我哋狀態非常好，實力強大，但阿根廷一樣咁勁，佢哋會係難纏嘅對手。」哥倫比亞就會同美國爭季軍（now650台下周日8:00am直播）。