恭喜英格蘭射手占美華迪加入球壇最強嘅球隊，同美斯、基斯坦奴朗拿度、伊巴謙莫域、迪馬利亞等做隊友！邊支球隊招攬到咁多勁人？當然係阿仙奴領隊雲格嘅險簽大軍啦！李斯特城噚日喺官網宣佈，同29歲嘅華迪續約四年，據報周薪會由八萬鎊加到10萬鎊（約115萬港元）；換句話講，華迪已經拒絕阿仙奴。另外，華迪喺英國間大屋睇嚟俾賊人睇中，有鄰居發現有兩個可疑人士喺屋前徘徊，所以報警，但警察嚟到嗰陣唔見有人。