上周去了西班牙旅行，途中識咗個印度人，學習速度奇快，轉數又高，講講下原來他是在印度一間電商工作，並形容自己公司為「印度版阿里巴巴」，仲預備緊上市㖭。講到咁把炮，越野兔返到香港就做了一點資料搜集，發現這家公司大有來頭，仲令到軟銀（Softbank）創辦人孫正義拋棄糟糠奮身力追，呢個印度西施就是Snapdeal喇！
早前孫正義高調拋售阿里巴巴，為2000年與馬雲「一見鍾情」後首次賣股，表面上當然話因為俾美國電信商Sprint拖累搞到周身債，但寶寶心底好明白，孫正義根本係貪新忘舊，見阿里巴巴勢頭唔太對路，預備轉投Snapdeal懷抱！
到底印度西施有咩咁吸引呢？論人口，印度絕對唔輸蝕，同中國睇齊有成13億！年齡中位數只有27歲，擺明人又多，又後生，加上印度的電訊網絡處於爆發階段，地區分佈散落，情況似足10年前中國，市場估計，單是印度電子商貿市場規模已超過220億美元，並以倍數跳級增長。市場潛力咁大，當然多人爭，現時印度電商三分天下，分別是亞馬遜、Flipkart及Snapdeal。以市佔率計，Flipkart以37%領先，亞馬遜佔21%至24%，Snapdeal暫時落後，佔15%。
其實孫正義早於2015年已經看上Snapdeal呢個印度西施，並聯同阿里巴巴及鴻海富士康投資了5億美元。今個月初亞馬遜計劃再揼多30億美元落印度市場大搞，市場估計孫正義有可能再出手加持Snapdeal，同亞馬遜死過，分分鐘下一間千億巨企就係咁育成出來！
越野兔
本欄逢周五刊出