呢排幾個大賽一齊舉行，小弟心目中位置係NBA>歐國盃>>>>>>美洲盃，唔係我輕足重籃，只不過歐國盃剛完成分組賽階段，美洲盃連續兩年搞，睇見巴西、烏拉圭呢啲所謂「強隊」嘅認真程度，真係趕客，相反NBA就打到總決賽，點都要頂埋佢先專心睇歐國盃。
星期一朝早相信唔少球迷都同我一齊睇Game 7直播，事過幾日，大家都知騎士贏波封王，其實兩隊都幾大分野，勒邦占士都31歲，呢屆都贏唔到，真係唔知幾時再贏，相反勇士屬衞冕之師，史堤芬居里同K湯遜仲大把世界，睇唔到佢哋有寸土必爭嘅鬥心，喺咁高水準嘅比賽，戰意一爭少少，就往往決定咗勝負。
今屆歐國盃，「狂牛」貴為衞冕之師，仲要係力爭三連霸，但開波前熱唔過法國同德國，教練迪保斯基（圖）都要負好大責任。西班牙經歷上屆世界盃恥辱性分組賽出局，亦都衞冕失敗，迪帥都曾經請辭，但西班牙足總就挽留，原本以為佢經過呢兩年時間，會開始重建球隊，冇錯，西班牙係有唔少新人上位，最重心應該係祖雲達斯前鋒艾華路莫拉達，但迪帥換血唔夠決心，之前仲要用迪亞高哥斯達，到費蘭度托利斯今季回勇，又有呼聲要重召佢，好在迪保斯基都有番啲遠見，堅持用莫拉達打正選中鋒，唔係攻力更加疲弱。
雖然迪帥都算老好人，但作為教練就唔夠威嚴，關鍵大戰鬥克羅地亞，下半場博到12碼，一個中堅沙治奧拉莫斯話自己有信心就去主射，乜堂堂前歐國盃、世盃冠軍，會好似街波咁冇系統㗎咩，結果射失搞到領先唔到，最後仲輸埋，要跌落死亡下線，衞冕荊棘滿途，迪保斯基絕對要負責。
文：牽牛