禮拜日沙田八草兩泥賽事，草地用全闊A欄，睇番最近5月22日同一移欄九場賽事，共有六匹頭馬守前四位入直路建功，而放頭馬更取得兩勝四位逾半上名，好似「帝豪寶貝」及「幸福指數」都係一放到底，似乎擺前走佔得先機始終較着數。
今戰列陣馬中，第六場「好叻仔」兩次跑田A欄都只係以頸位僅負，今次重返強項三甲機會甚大。另外，第五場「紅白」係全場唯一贏過A欄2000米之參戰馬，用蔣嘉琦擺前走有權帶到。
至於兩場泥地分別為1650及1800米，翻查近八場泥地中距離賽事，一檔馬勁取四勝兩位佳績，好似最近就有「威利熱流」及「勁開心」勝出，第一場「大團圓」及第四場「喜利高」抽得黃金一檔，值得優先捧場。