噚日天氣熱辣辣，天文台話最高達到34度，滙豐喺呢個日子，喺調景嶺善明邨戶外宣佈啟動流動銀行車，滙豐銀行副主席王冬勝（Peter），同埋金管局總裁陳德霖（Norman），喺烈日之下都着得非常casual。
有「攞命陳」之稱嘅陳德霖每次公開露面，必定執到正，西裝打領帶。噚日佢都頂唔住攞命嘅太陽，夾埋Peter一齊裇衫、西褲。佢揀咗件直條裇衫，當啲直間伸延到去腰部時，忽然間有啲扭曲，原來係有個小肚腩頂住咗，so sad。
舊年底渣打推出流動銀行車嘅時候，Norman都有出席，不過就正常着西裝。夏天，可能係男人嘅陷阱！