德國中場舒韋恩史迪加（小豬）喜事一件接一件，英國《太陽報》噚日話佢已經同網球明星女友伊娃諾域訂婚，31歲嘅小豬同28歲嘅伊娃拍咗兩年拖，感情好穩定，狗仔隊周不時影到佢兩個行街或者小豬去睇伊娃比賽。德國傳媒日前仲話佢兩個已經派晒帖，會喺歐國盃後結婚！除咗愛情得意，德國已經打入歐國盃16強，小豬亦喺對北愛爾蘭場分組賽後備上場，以15次成為歐國盃上陣次數最多嘅德國球員。