不少人家中都有支雙飛人藥水看門口，因為它最犀利是專治痱滋，不少高登仔就形容它對付痱滋「極屈機」，幾乎萬試萬靈。但原來除了醫痱滋，雙飛人藥水還可以用作調味料？雙飛人的官方facebook最近發佈了一條新帖文，題目是【薄荷朱古力雪糕是如何煉成的？】，內文竟然是教人滴兩滴雙飛人藥水落雪糕，就可以變成薄荷味雪糕！
不少網民大感驚奇，有人就鬧廠商「發錢寒」，亂教人食藥；又有人稱會用雙飛人清潔手機，因為貪其有酒精成份。不過，亦有不少網民稱，其實雙飛人藥水是可以外敷內服，有消炎及治療傷風感冒的效用，而且味道亦相當不錯。翻查法國雙飛人藥水的官方網頁，其主要成份是薄荷油、蒸餾水及乙醇，乙醇亦即是酒精的主要成份之一。如果想嚐試新口味，不妨加幾滴試吓啦。
【網民洗版】
Vk Lo：識食一定食雙飛人雪糕
JeaIousy Kwok：真架呢個！檸茶加兩滴變冰極檸茶！我真係試過！
士呠婷 睇完個post連原本雙飛人用黎做乜都唔記得咗
錢沛彧：有飛滋食到冇飛滋，其實雙飛人有冇諗過出雙飛人藥水味道雪糕？
Ryan Ng：試試白花油或高露潔
Jacqueline Chan：我係用雙飛人嚟抹手機，貪佢有酒精成分