意甲班霸祖雲達斯下月30日喺香港大球場對南華場國際足球挑戰盃，門票噚日朝開始預售，不過球迷嘅反應就不似預期，門市未見人龍，到底場波去唔去到南華足主張廣勇目標嘅兩萬球迷，真係有啲疑問喇。
張廣勇飛巴拉圭班兵
祖記今次季前集訓會先去澳洲踢兩場，之後就飛嚟香港對南華，而賽事門票噚日發售，可能因為有唔少售票處，又可以上網買，仲有電話預訂，噚日朝早只有幾個球迷到灣仔通利售票處買飛，成朝都唔見人龍；據職員講，買飛嘅球迷主要買$500、$400、$300同$180特惠飛。
有球迷喺南華官方fb度留言，問幾時會知保方、基亞連尼、巴沙利同邦路斯等意大利國腳嚟唔嚟，據負責籌組賽事嘅推廣公司話，祖記下月先會提交暑期東遊嘅名單，原則上會以最強人腳去準備新季。其實，祖記班國腳係咪隨隊，主要睇球員所屬國家隊喺歐國盃去到幾遠，而球員踢完比賽通常會放三至四星期假，之後先歸隊，球迷睇埋祖記訪港名單先決定買唔買飛都好正常吖。另外，張廣勇近排飛咗去南美同巴拉圭前國家隊經理Ruben Ruiz Diaz見面，Diaz會推介啲前鋒畀南華教練團挑選喎。