太陽娛樂文化老闆周焯華（洗米華）同正印陳慧玲搞緊離婚，女友Mandy Lieu喺倫敦幫佢陀緊第二胎，之前搞baby shower時，洗米華披住老虎仔口水肩放風生仔。處於下風嘅洗米嫂忽然將形勢逆轉，洗米華日前喺澳門公司股東聚會攬實老婆大唱《愛我別走》，又冧老婆話周太只得一個，搞到洗米嫂眼濕濕，引嚟全場起哄要求佢哋復合。
解釋飲醉
噚日有報道指洗米華完成香港工作未有即飛倫敦，反而返澳門出席股東榮休大會，係部署趁個活動有家族親友出席嚟箍煲，洗米華飲多兩杯趁機上台冧老婆，身邊友人透露佢根本想維持現狀，繼續左右逢源，就算離婚都未必會娶Mandy。報道更指身在倫敦嘅Mandy知道此事即大怒，仲喊晒口要搵洗米華，洗米華日內會飛倫敦𠱁女友。唱情歌事件發生後，Mandy好快得悉此事，即同洗米華視頻聯絡，洗米華解釋因醉酒先會上台攬老婆，未知Mandy受唔受𠱁。
撰文：馮仁昭
