雷軍旗下小米以往主要做手機，家陣越來越多搞作，繼空氣清新機、電飯煲之後，最近推出「米家騎記電助力折叠自行車」，齋睇個名都覺得「騎呢」，要拆開先明佢講乜，其實簡單啲，叫做「米家騎呢自動摺埋單車」都得。
呢部單車售價2,999人仔，小米聲稱，目前同水準產品喺歐洲市場普遍售價要成萬蚊。
公司介紹，「電助力自行車」有別於傳統單車與電動車，係透過踩單車嚟發電，上斜嗰陣，就可以唔使力而保持高速前進。可惜電動單車喺香港未合法，即管睇吓部車喺內地市場賣成點先喇。
不過話時話，小米以手機起家，但近期推出呢類唔關事嘅產品越嚟越密，唔通手機市場真係咁唔掂？