恒生管理學院傳播學院，搵到前中大猛人加盟！身為中大社會科學院院長嘅李少南退休後，會加盟恒管傳播學院，肩負拓展碩士課程嘅重任。而喺呢個網絡資訊發達時代，傳播學院亦準備開辦新課程「融合媒體傳播科技（榮譽）文學士」，課程等緊行會批准，如獲批最快今年9月開課，名額60個，主力訓練跨媒體人才。
有卅年教學經驗嘅李少南，係首位獲特區政府委任為廣播事務管理局委員嘅學者，來頭唔細。佢喺傳媒聚會時話呀，除咗跨媒體課程，同時想加強培訓公關人才。咁又係，坊間成日發生「關公災難」，可見呢個行業幾需要專業嘅人才。
恒管傳播學院院長曹虹則透露，為配合新課程，學院會投放千萬添置新教學設備，包括電視錄影廠同控制室等，將理論課技巧應用喺實際中。