英國脫歐公投唔只搞到股滙市勁chok，好多做銀行或者投行嘅人都怕咗脫歐，事關英國一旦脫歐，當地銀行業首當其衝，佢哋分分鐘連工都冇埋。
咪以為佢哋杞人憂天，實情係，公投未有結果，但以資產規模計、全英國第三大嘅蘇格蘭皇家銀行（RBS）噚日已經率先傳出喺英國裁員900人，後勤同IT部門係重災區。
英國政府持有蘇皇73%股權，聽講，RBS行政總裁McEwan希望透過裁員行動，今年慳到8億英鎊，近91億港紙呀。
RBS對上一次裁員行動係喺今年1月，喺英國炒咗2,700人。目前RBS員工人數有8.78萬人，對比2008年金融風暴有18萬人，短短8年間，約有10萬人冇咗個飯碗，都咪話唔恐佈。難怪業內人士咁擔心英國脫歐。