過去一講起仔女，都會忍唔住甜笑嘅公民黨黨魁梁家傑，近日飛咗去蘇格蘭，參加幼子大學畢業禮，一家五口罕有聚首一堂，難怪傑哥都話特別珍惜。
傑哥幼子畢業嘅大學，喺當地相當有名，係威廉皇子同凱特王妃都讀過嘅聖安德魯斯大學（University of St. Andrews）。其實傑哥嘅仔女個個讀書都好叻，佢女女Jennifer更曾演出莎士比亞環球劇場《王子復仇記》，成為該劇巡迴全球205個國家演出嘅唯一亞洲演員。
唔少網民見到傑哥嘅家庭照，都話感覺到傑哥好幸福，叫佢好好享受家庭樂，又話一對孖仔個樣，同傑哥餅印一樣，唔知大家又覺唔覺？