英國喺當地時間6月23日會就係咪退出歐盟舉行公投，全世界都關注英國人揀留歐定脫歐？因為對經濟有好大影響，香港唔少立法會議員都金睛火眼，尤其曾喺英國放洋嘅。八方問過嘞，大部份都評估脫歐機會唔大，支持留歐，包括立法會中、青代兩男神，自由黨主席鍾國斌（Felix）同公民黨楊岳橋。
鍾國斌買英鎊博升
有政界方中信之稱嘅Felix，先喺蘇格蘭Aberdeen嘅The Robert Gordon University建築物料測量學士畢業，再喺當地Stirling University讀埋工商管理碩士，多年嚟已浸出一陣英味。若然有份投票，Felix都係撐留歐，嚟自商界嘅佢話若脫歐成功，香港都難以置身事外，最擔心嘅情況係產生骨牌效應，其他國家都要脫歐，到時引起嘅經濟動盪好大。
但佢評估脫歐唔成，原因之一包括蘇格蘭都支持留歐，佢近嚟仲買入英鎊博公投之後會升番，但強調唔係大手買入投資，只係佢個寶貝女喺英國讀書，學費要幾多就買幾多喎！
同樣喺英國留學、畢業於University of Bristol嘅新一代政界人氣王岳少都支持留歐喎，佢認為英國𠵱家嘅領導班子，未必能處理到脫歐後一連串要處理嘅問題，仲笑言若以婚姻作比喻，等於個老公冇打你、冇家暴，只係畀少咗家用箒，若然自己獨立走出去，可能仲少咗錢使喎。唔知岳少呢個例子，脫歐派buy唔buy呢？
mailto:[email protected]