新地（016）錦田新盤上周推出120%按揭計劃，長實（001）元朗「世宙」即推123%按揭還擊，計劃詳情、風險不贅。最吸引我注意嘅，反而係該新地樓盤名稱「PARK YOHO Venezia」。
「Venezia」係意大利文，即係威尼斯（Venice）。發展商捉華人崇洋心理，樓盤名稱扮外國並非新鮮事，畢竟叫「維也納花園」、「曼克頓山」、「凱旋門」，「六本木」，甚至英意夾雜、九唔搭八的「The Palazzo」，銷情總會好過叫「北京胡同」、「上海弄堂」。
崇洋都唔緊要，但扮威尼斯就唔係幾吉利喇。威尼斯有兩樣嘢聞名天下，第一係「水都」，而且每年陸沉二毫米。樓盤名令人聯想到陸沉，無論從樓宇結構定投資角度，都十分不祥。
第二係「Gondola」（貢多拉），遊威尼斯例必坐嘅艇仔。近年買新盤，樓價多數跑輸二手樓，甚至逆市「坐艇」，但由於按揭成數低，多數坐艇業主都未淪為負資產。
120%按揭卻被樓評人譏為「即買即變成負資產」。雖然小生唔認同「即變負資產」嘅講法，因為120%當中嘅25%喺按埋手上舊樓所得，只有當買入新盤後跌價5%至會變負資產，但如此市道，樓價跌5%話都無咁易，計劃做120%按揭嘅買家，小心上晒gondola、變晒負資產呀。
笑笑生
mailto:[email protected]
本欄逢周四刊出