噚日大家樂（341）舉行業績會，亦係羅開光與羅德承兩堂叔侄首次以新title見傳媒。主席羅開光好畀機會後輩，佢講咗幾句開場白之後，就將問答環節交畀剛升任首席執行官（CEO）嘅羅德承負責。
可能因為第一次主持業績會，羅德承答問題時，好似有些少緊張，仲有啲口窒窒㖭，不過都叫做背熟書，有問必答。會後佢承認「（第一次）都有啲緊張㗎，壓力一定有」，又話當今次係練習，都幾坦白喎。
睇番資料，現年54歲嘅羅德承早於1996年加入大家樂，喺集團工作咗廿年，2014年由執董兼業務拓展總經理，升為行政總裁（業務拓展），2015年再升為副首席執行官，直到今年3月再獲委任做CEO，兩年幾升3次職。