現年45歲的何婉盈（Elaine），91年參選港姐，雖然三甲不入，但加入娛樂圈後發展不俗，拍劇、司儀、出唱片樣樣做齊，是不少藝人的夢想；惟發展僅5年，Elaine決定重返校園，再轉職到馬會做公關，一做便12年，目前在證券公司做股票投資，同時跟友人合資開餐廳，離開娛樂圈近20年，生活繼續多姿多采。
回想當年忽然放棄演藝工作，Elaine日前在灣仔受訪時表示：「嗰時拍劇係外景、廠景接住拍，有次病咗好辛苦就諗自己真係咁落去？加上因選港姐冇完成美國學位，爸爸一直耿耿於懷。」
怕唔習慣
問Elaine何不全身投入商界做女強人？她承認只做生意沒有安全感：「為咗囡囡行每步都要謹慎啲，由細到大都未試過唔返工，淨係做生意會冇安全感，所以維持𠵱家嘅工作方式係最好。」
Elaine在93年曾與魏駿傑拍拖，分手後於01年嫁商人傅大全，但婚後年半宣佈離婚，07年自爆36歲時做了單親媽媽，囡囡今年9歲。她表示：「同囡囡已經有個生活模式，如果有人入侵，相信我哋都唔習慣，而且𠵱家個『愛』字喺囡囡度。」
撰文：草津
場地提供：RedMR紅人派對