人生在世，太多事掌控唔到，難得一次捨得額外畀錢坐Exit位，諗住有得伸長隻腳坐得舒服啲，點知就送一個最惡頂鄰座陪你起飛，真係未出發先嬲咗。相信每個人心底裏都有個「最不理想鄰座」清單，每次踏上飛機前一刻，心情都猶如拆禮物般緊張，求神拜佛唔好坐正喺XX嘅人隔籬。最近外國網上旅行社Airfare Watchdog做咗個調查，統計旅客「最不理想鄰座」的特徵，其中得票最高（47%）嘅係病人，成程機聽住人又咳又擤鼻涕，喺一個密封又狹小嘅空間，病菌無處可逃，被傳染咗就真係太唔抵喇。調查結果中第二位（18.4%）係過重人士，而第三位（18.2%）則係有體臭嘅人。其實記者最怕遇到，把口無時停嘅鄰居，曾經試過由三藩市搭返香港，十幾小時飛機，隔籬位70歲老伯由自己出世開始講起，訴說生平事蹟，又唔好意思叫停佢，只能禮貌地點頭微笑，真係妹妹不行了。
記者：盧懿靜
資料來源：Conde Nast Traveler