鶴臣呢次真係捉蟲嘞，喺分組賽末輪玩輪換，搞到英格蘭得小組次名，佢唔單止被英足總照肺，仲好大機會冇得續約。英國《太陽報》話，英足總對鶴臣喺對斯洛伐克場波嘅用人調動好不滿，令英軍大好形勢之下冇咗首名，要以次名晉級地獄一樣嘅下線淘汰賽。英足總主席戴克之前話，英格蘭呢屆要入到四強先會考慮同鶴臣續約。家陣英軍就算打入八強，都好大機會硬撼東道主法國，睇嚟都好難入四強。至於一班英格蘭球員禮拜二有假放，好似韋舒亞就同女友拍拖，而哈利卡尼同占美華迪就約埋去打高爾夫球輕鬆吓。