肥之嘛，使乜驚喎！知道健康重要，但有時吃多咗沒時間做運動，又有時……有肉地這回事就在基因裏，有啲肥也不是罪吧？小肥肥一族都可以有自己一套生活方式，而日常遇到的小小問題，總有聰明方法解決！
1.扣唔埋褲頭扭：成條褲都啱着，係扣唔埋褲頭鈕，加條用來紮頭髮的橡筋，記住橡筋唔好太粗、彈性要好。用橡筋扣住鈕，穿過鈕眼，兜番轉頭再扣鈕，搞掂！褲頭仲好有彈性㖭。
2.爆衫：恤衫彈性太好，搞到出現鈕與鈕之間爆開的尷尬問題，用扣針從衫底扣穩，不要穿過面布，就可以扣好恤衫而神不知鬼不覺嘞。
3.緊貼褲管的大腿：夏天出汗，人之常情，粗腿黏着褲管很不舒服，出門前可先撒些爽身粉在大腿內側，減少皮膚同褲的磨擦，行起路嚟應該會爽好多！
4.包包面：男仔女仔都可以化妝，打少少陰影就更加casual，在面頰、額頭或鼻翼加少少比膚色深一度的粉底膏或陰影膏再掃開，成塊面的輪廓自然立體晒。
5.我似企鵝？成日怕被人笑身形不好，搞到個人無晒自信，低頭夾住個身行路，梗係會行到成隻企鵝咁；其實只要企直啲、頭抬高啲，再加番個親切笑容，仲有邊個敢笑你係肥仔肥妹呢？
記者: 容慧心
攝影: 黃子偉
