賽馬運動經常係運氣與鬥志的結合！新西蘭前冠軍騎師寶遜，剛啱禮拜日在港至憑苗廐「大把籌碼」於泥地一放到底，爆冷首次在港贏馬，幫自己舒緩咗唔少壓力。相隔短短三日，寶遜這晚轉戰谷草，於第二場四班1000米，夥拍告達理馬房「歡喜」貼欄由頭帶到尾，個人首勝谷草賽事，信心同手風完全返晒嚟，「歡喜」12倍敲響今季勝鼓，組合獨贏A2派24元正。
今次係寶遜首度策騎「歡喜」出賽，此駒之勝幫埋告達理打破個幾月頭馬荒，亦係練者自上月22日娶新抱以來首度贏馬。今場二至四名都由後上馬經手，順序為「創意寶」、「旅英公爵」及「大收成」，四重彩派九萬六千幾。
另一方面，今場大熱及次熱門馬齊出事，雷神的3.6倍大熱「氣勢如虹」及蔣嘉琦的3.9倍次熱「育馬妙星」，竟然一齊慢閘，結果雙雙落第冇影，其中「育馬妙星」賽日早上因運馬車起程往跑馬地途中壞冷氣而要折返，並改搭另一部車渡江出賽，臨場表現實際有冇受此突發事件影響，咁就不得而知！