「矛盾大對決」之男神黃子華，配上太刻薄大家樂（341），結果顯然易見。但面對形象衰到貼地嘅大家樂，連深得港人歡心嘅黃子華都挽救唔到。
大家樂個定位，喺大家心目中，都應該將佢列為「頹頹地食一餐」之列。快餐店呢類股份，更加係經濟轉差時嘅救命股！大佬呀，你更窮都要食飯，好嘅又一餐，唔好嘅又一餐，大家樂呢啲平得來又唔算太差，仲唔係經濟危機下的「好西」？
講經濟危機，金融海嘯夠危喇啩，但你睇番2008年業績，全年多賺18%；睇埋2009年，盈利增長係收窄至5%，但佢仲係有賺，而且盈利創新高！
家陣夠話經濟轉差啦，咁點解全年仲要盈利倒退先？因為今日嘅大家樂，已經唔再係大家以往認識嘅大家樂。
頭先講過，大家樂喺大家心目中嘅定位係「頹頹地食一餐得來又唔難食」。不過唔知大家有冇試過，有一晚大家好肚餓，然後行入大家樂想hea食快閃，睇一睇個餐牌，「嘩！想食嗰啲閒閒哋60蚊、70蚊落樓」。經你屈指一算後，「我不如畀多少少錢食好啲」？然後離開。冇錯，你對大家樂嘅餐牌，係覺得非常矛盾。
你覺得好火，「收得咁貴學咩人做大家樂」！然後令你更火嘅係，你久唔久就睇到新聞，見到佢刻薄員工，又OT冇補水，湯渣畀員工食，見埋地獄更表，你又心諗「價又識加，對員工就咁差！」
Come on！萬事皆有因！公司近年純利率越跌越勁，最新純利率只係得6.8%，係近年新低，睇番2011年，當時有9.6%！近幾年租金升幾多？點都唔係用一兩個百分點去計吧？咁最易轉嫁去邊？咪就係加價，兼走去剝削，做死你班員工。
至上年9月底，大家樂有158間分店，今年3月底最新有157間，淨減少一間。不過，集團總員工數目，就由9月底的18,028名，減至今年3月底的17,575名，少了453位。公司解釋話係，因為Spaghetti House撤出中國，所以減咗200幾人。
但嗰度得三間舖，唔計你呢三間，即係你仲多咗舖，但人仍然係減200幾人，如果係因為效率高咗，咁你呢間真係神奇企業！
Butterfly effect大家識啦，班員工做到隻「積」咁，啲嘢食邊會有heart？所以你上大家樂fb，我真係未見過一間餐廳，個個post樓下都有人話邊日去邊間大家樂，投訴又話啲扒鋸唔開，又話啲嘢食冇味盛盛。結果係，在「你有咩人工，就有咩員工」定律下，搞到食客「畀多幾張銀紙，卻換來服務一pat屎」。
下次見到大家樂員工向你黑面，你想發火前，可試下沉著氣，記住「快樂第一，員工冇份」，佢哋分分鐘只係食緊你啲湯渣。
千頌C
http://www.fb.com/winbigwok
〈趣BLOGBLOG〉暫停一期