食物及衞生局局長高永文同工聯會立法會議員陳婉嫻噚日，到訪九龍城多間賣潮州特色食品嘅舖頭，本身係潮州人、即係忌架冷嘅民望高多次拋書包，向嫻姐介紹潮州特色嘢及有關歷史，獲嫻姐大讚「我諗高局長本身就係本書嚟嘅。」
其間民望高介紹咗佢最鍾意食嘅潮州綠豆餅，「用綠豆蓉嚟整就清甜啲。」不斷試食嘅民望高食極都唔夠，最後仲買咗4盒綠豆餅，盛惠100蚊。一行人之後去試食「巴浪」魚乾，民望高又介紹嫻姐食黑欖，自稱細細個成日食，仲用潮州話叫老闆攞士巴拿，即場表演打爆欖核，將欖仁送入嫻姐個嘴，真係好體貼㗎啫！
