星爺話齋︰「做人如果冇夢想，同條鹹魚有乜分別呀？」為鼓勵中學生追夢，香港青年協會同保誠保險公司連續3年舉辦「成功在望」獎勵計劃，星期日會搞「尋找夢想天使」活動，屆時將揀選50名參加者並協助佢哋暑假實行「夢想計劃書」所訂立嘅活動，之後再揀20名終極優勝者，每人獲一萬蚊獎金。
「神奇小子」曹星如係當日活動嘉賓，佢勉勵年輕人勇敢追夢，「放棄有一萬個理由，但堅持只有一個。」曹星如從小接觸拳擊，佢話成為職業拳手後唔少人潑冷水，諗過放棄但慶幸有教練引導，「好多人一開始就會諗終點，行到兩步就想放棄，但教練一開頭會幫我定啲短線目標。」佢鼓勵年輕人探索興趣，向目標進發，「人哋潑嘅冷水可能係動力嚟，佢哋睇唔起你，你就要做好件事，用行動去話畀佢哋知其實你係可以嘅。」
青協共收到約400份夢想計劃書，青協督導主任鄧良順話，計劃書着重內容多於文字，主要係幫年輕人追夢。