無綫前藝員簡珮筠（June）曾拍《神鵰俠侶》、《阿Sir早晨》等經典劇，逃離娛樂圈十多年的她，驚爆遭生意拍檔出賣及小產兩次的慘痛經歷！現年43歲的June，昨在圓方接受本報訪問說：「離開娛樂圈之後，轉做美容生意，自己一直好努力工作，其中有五年搬去上海住，唔識講普通話攞住兩個篋全國走，真係好多辛酸眼淚。」
近年因公司生意好，拍檔提議搞上市，結果雙方卻反面收場，她說：「佢哋好憤怒，態度好差，我覺得唔合理，去年尾發現自己有BB，佢哋不停寄騷擾信畀我，講好多唔係事實嘅嘢恐嚇我。」June難過地說：「我好唔開心，每日都喊，情緒好差，可能咁樣冇咗BB！」問到是否第一胎？她說：「第二次！上次有BB係一年幾前，當時我喺瑞士，因為同佢哋有唔同價值觀，大家有少少衝突，去到醫院冇咗！醫生話我有兩次小產，因為我年齡唔細，再有BB機會降低，先生係九代單傳，我心裏都有壓力，奶奶老爺見親我都問，我同先生感情好好，呢兩次經歷真係好心痛。」
June表示返港數月後，朋友告知她的品牌被上市公司收購：「點解可以咁做？公司仍然屬於我，我去咗報警，交警方處理。佢好似丁蟹一樣，將歪理變真理。感恩老公一直喺我身邊，上天賜畀我咁好婚姻，即使經歷兩次小產，佢從來冇喺我面前表現唔開心，我知道佢好愛我，我都會內疚，好似我嘅事業令佢冇咗兩次BB！」
採訪：盧妹
攝影：沈健程