美魔女羅霖噚日喺灣仔出席「絲漣床褥The Art of Sleep」慈善拍賣發佈會，善款將撥捐香港乳癌基金會。羅霖早前公佈有追求者J君求婚，活動上，司儀就問佢若結婚係咪買大床，佢即笑言：「未應承，同埋冇理由我貼大床，係都叫佢買，要貼埋成間屋。」
擇偶唔睇物質
羅霖又話同J君喺香港同內地都有見面，又有用短訊聯絡：「佢心急過我，遲啲會安排小朋友過目，阿仔都有問我見過佢未，細仔就話一定要錫我。」佢又大讚J君有80分，話對方見到新聞出街好開心，羅霖話：「我同佢講係公佈咗背脊，唔好開心住，要有啲耐性。」問到J君係唔係筍盤，佢就話：「未諗過，識一個人注重品格，物質唔會睇，之前有兩個追求者都好有錢，可以唔使做。」
提到無綫節目講培養子女要「贏在射精前」，羅霖好反感話：「小朋友6歲前你都可以控制，當佢哋到青春期就控制唔到，佢哋有獨立思想，唔係父母想點就點，就算讀書幾好，一有情緒病就做唔到，工作受唔到挫折，最緊要健康成長，有啲初為人母要佢十項全能，我有啲朋友嘅小朋友，由細到大考第一，去到外國變咗另一個人，最緊要快樂成長做個好人，抱咁大希望，最終失望係自己。」
撰文：馮仁昭