百仕達（1168）手頭有超過30億元現金，超過晒成間公司總市值，就算點橫風橫雨，都無有好怕，現金牛等發圍。
百仕達到上年尾有32.8億元現金，得1.32億元借款，淨現金高達31.5億元。百仕達呢批現金，大部分係港元、人仔同美元，雖則，當中分佈點，唔知。但百仕達以港元入賬，上年人仔貶值因素，已經反映。
計計數，百仕達每股淨現金高達0.89元，集團現價0.85元，潛喺一年底，仲要低過每股淨現金。揸一股百仕達，都未嚟得切反映每股淨現金，現價兼免本揸住集團其他資產！而集團超級銀彈，有壯大業務優勢。
百仕達到上年尾NAV 1.95元，現價0.44倍PB，又粗略計數，百仕達姐妹系威華達（622）計埋頭一季證券投資減值，家陣0.55倍PB，百仕達比威華達平咗20%。仲要咁睇，集團家陣喺上海揸咗兩個項目「洛克·外灘源」同「寧國府邸」。
後邊寧國府邸，11棟四合院模式建築物，每棟面積1,000至1,500平方米，但咪睇size細，呢批物業，位處長寧豪宅區，係超筍地段，物業兼預計預計今年下半年完成。諗到係，隨住呢批物業推出，百仕達隨時又有肥仔增值，嚟緊日子，PB隨時仲低仲抵搞。
煲百仕達，當只係追番上威華達0.55倍PB水位，已經講緊要升32%，到1.07元。
錢雋
細價股專家
本欄逢周二、四刊出