前發展局常秘（工務）韋志成去年4月退休，年幾後受聘市建局出任行政總監。有乜驅使韋志成再次走入熱廚房？原來佢太座功不可沒。佢同傳媒茶敍時透露，太太細佢成廿年，「我退咗休，佢（太太）又返工，佢都贊成如果我覺得有意義就去做。」得到太太鼓勵，令佢決定重出江湖。
今年61歲嘅佢自爆退休後有成4至5份工向佢招手，教育界同工程界嘅都有，笑稱人口老化嚴重，「希望我仲有能力做到少少嘢時都可以做多啲。」
對於市建局之前有唔少人事紛爭，主席蘇慶和同前行政總監譚小瑩傳不和，韋志成就話佢同主席其實一早相識，關係亦好好，思想上好接近，仲幫口話對方咁大年紀仲願意擔當主席好難得，相信合作上唔會出現問題。