唔止衝入球場嘅球迷，我求大俠都想跪拜美斯！美斯繼續喺美洲盃有球王級嘅發揮，周二喺四強交出兩次助攻，仲射入一個靚罰球，助阿根廷以4:0大破東道主美國入決賽！美斯𠵱家仲累積55個國際賽入球，超越名宿巴迪斯圖達，成為阿根廷史上嘅入球王嘞！
美國話晒都係主辦國，諗住佢哋可以畀啲威脅阿根廷，但有美斯，美國有天時地利都冇用！開波三分鐘美斯就助攻拿維斯入波，32分鐘佢親自主射罰球，皮球直飛上角入網，角度刁鑽，技驚四座，美國門將巴特古辛撻到癱癱腰都救唔到呀！靠呢個靚波，美斯職業生涯累積55個國際賽入波，超越巴迪斯圖達，做咗阿根廷史上嘅第一射手。美斯賽後都謙，話多得隊友支持先破到紀錄。
轟55球成阿國入球王
換邊後，美斯都冇放軟手腳；希古恩之後梅開二度，其中一球亦係嚟自美斯嘅助攻。美斯喺國家隊交出過35次助攻，其中九次都係畀希古恩。最終，阿根廷以4:0大勝美國入決賽，對手係邊隊？就要睇今早八點開波的另一場四強，智利對哥倫比亞邊隊贏啦（now 650台今日8:00am直播）。美斯喺今屆美洲盃前有啲傷，佢踢咗四場，得兩場正選，夾埋出場254分鐘，但佢已經為阿根廷製造咗九個入球，包括五入球及四助攻。見到美斯勁到喊，有球迷都忍唔住喺下半場前衝落場，仲攞簽名，喺美斯面前拜咗兩吓。美斯處之泰然，笑笑口摸住球迷個頭，等個球迷拜完之後，仲親切咁攬咗佢一吓。
要破「千年老二」宿命
講到破入球紀錄，對於美斯嚟講都係家常便飯，但國際大賽冠軍一直係佢嘅遺憾。對上兩年，阿根廷先後打入世盃同美洲盃決賽，但美斯兩次都飲恨得亞軍，今年佢當然想打破連續兩年做阿二嘅厄運，「再入決賽係我哋嘅目標，家陣我哋做到嘞。大家嘅願望都係捧走冠軍，我認為我哋配得上呢個錦標。」
