餐廳R有大學同學B先生攜眷訪港，一家四口住在灣仔君悅酒店。凡是遊客都會詢問貴賓服務枱：「香港有乜代表性嘅本地特色食店？」君悅介紹：「陸羽最有歷史，可以一試。」B先生於是攞住地址，出門口坐的士到陸羽，話咁快就到，但入到地下，夥計就叫上二樓，二樓又叫上三樓，三樓多數話冇位，於是乘興而來，敗興而返，後來搵餐廳R講起，餐廳R大笑不止：「係咁嘅嘞，不如我帶你兩公婆去。」點解唔係四個去？因為兩個隨行兒子搵唔到位就算，唔肯再去，十六七歲美國仔，點會欣賞老式廣東菜喎。
呢日就在陸羽與佢地同枱，B先生話佢三十幾年前來過香港，在啟德機場降落，以為係飛機師表演低飛特技，眯埋眼唔敢睇，呢次就覺得赤鱲角機場好先進，好方便。B先生原來係發達之人，住在三藩市北岸對面之Sausalito，豪宅區也，於是問呢位有錢人住在美國有乜唔好，佢哎吔一聲：「我交稅超過50%，聽到老同學R在香港只交稅15%，幾乎想申請做香港人！」冇咁易，住在美國豪宅區之美國人要放棄國籍護照，實俾稅務局查稅查餐死先至放行，過程極具困擾性，餐廳R來港數十年，放棄美國籍就簡單得多，既然討厭交高稅，嚟緊十一月選邊個做總統呀？佢答得妙：「慘矣，一個係大話精，另一個係屎弗鬼，點辦？可能留在家中不投票！」不過加州選民以工會、公務員、教師組成嘅勢力最大，係民主黨大票倉，共和黨永遠都唔會在加州贏得大選；美國民主黨政治理念較為左傾，略帶社會主義派福利色彩，上述三個大選民團體，從來都爭取更多福利、更廣泛權益嘅，見到共和黨人就唔啱。B先生話加州有一條鐵路興建幾年，最近先至發現從中國進口之螺絲釘不合規格，要全線停工，全部逐粒釘去檢查，完工更加遙遙無期，B先生話：「工人全部美國人，人工甚高，十幾年保障有工做，工會全力為鐵路護航，有糧出就得，懶理工程超預算，大超支，而建築材料就貪平，全部鋼材連螺絲釘都自中國入口，依家搞出個大頭佛，埋單嘅就係我地交50%稅嘅人！」咁興建洛杉磯至三藩市高鐵又點呢？B先生話：「我誓死反對㗎，一話起高鐵，即係幫工會買多一套十幾年鐵飯碗。」唔駛反對咯，美國已單方面宣布中止與中方合作興建呢條高鐵，原因係不能全部進口中國材料喎。