𠵱家係勇武年代，但究竟乜係「勇武」？八方同事話喎：「今時今日啲人對『勇武』要求好低㗎咋，只要肯離開keyboard就算係。」等八方仲以為郭靖為國為民、白髮魔女敢愛敢恨先算勇武㖭。吖，仲有，今屆香港書展都好「勇武」，因為書展首次設嘅年度主題，就係「武俠文學」，仲唔係武「字」當道，等大家「武」文弄墨？
另闢金庸展區
書展7月20至26日喺灣仔會展舉行，上屆有逾100萬人次入場。香港武俠文學始於上世紀五、六十年代，報章上嘅武俠文學連載專欄由於受歡迎，唔少都結集成書。武俠小說從來冇過時，今時今日仲有讀者，有啲仲變成漫畫、電視劇同電影。
文藝廊會配合推「筆生武藝 —— 香港的武俠文學」展覽，介紹8位唔同年代武俠文學名家，包括梁羽生、金庸、古龍、倪匡、溫瑞安、黃易、喬靖夫及鄭丰，會展出早期連載式武俠小說剪報、初版小說、劇本、漫畫，仲有漫畫家李志清—系列武俠畫作。
8位大師中，文藝廊另闢展區「文壇俠聖 —— 金庸與查良鏞」，介紹金庸武俠小說、電影、報業成就，仲有金庸手稿、親筆對聯、電影海報、電視產品等。另外有多場武俠文學講座，喬靖夫、鄭丰會出席同讀者交流。今年書展門票25蚊，詳情可以到呢個網站睇睇 http://www.hkbookfair.com 。
李八方
mailto:[email protected]