彭羚、陳秋霞同林志美噚日返到九龍城嘅母校民生書院，為90周年校慶拍攝名為《光與生命》嘅MV，執導嘅係林嘉欣老公、同為校友嘅袁劍偉。彭羚笑言畢業後只返過一次母校，佢話：「最懷念係個操場，好幸運學校有個咁完善操場，以前放學後我唔願返屋企，會留喺操場睇大哥哥大姐姐打籃球，而我哥哥係踢足球嘅，之後我加入埋泳隊，學校有個細細哋嘅泳池畀我哋游水。」
秋霞禮堂練膽識
1974年中學畢業嘅陳秋霞就話母校除運動出色外，音樂亦都好出色，大家可以喺禮堂有演出機會，可能上台嘅膽識係喺呢度練番嚟。林志美除咗參加學校歌唱比賽，仲有朗誦比賽，兼且跟同學組成樂隊，彭羚指當年喺學校已經一早聽到呢兩位出名嘅師姐。
今次義務返母校拍MV，佢哋都係二話不說就答應參與，仲笑言只係得把聲，所以就負責獻唱。另外，成個拍攝隊伍都係校友以邊拍邊學方式完成，問到彭羚係咪有人邀請佢復出開騷時，佢話：「我冇聽到呢個消息，你聽到就話我聽。暫時唔會復出啦，只係幫學校做嘢。」
撰文：馮仁昭