上場英格蘭對威爾斯，鶴臣半場換兩個人幫球隊反勝，簡直係戰術大師一樣；但周一呢場對斯洛伐克嘅歐國盃B組末輪分組賽，鶴臣就玩大咗，坐定粒六輪換六個正選，點知攻唔入對手，踢成0:0！由於威爾斯喺另一場贏波，英格蘭只能以B組次名出線，話唔定下圈會對葡萄牙。鶴臣拍心口話冇驚過任何球隊，但佢哋似乎就好驚互射12碼，所以喺分組賽已經每日練定12碼。
輪換六件悶和斯軍
賽前英格蘭需要多一分先肯定出線，但睇英格蘭對斯洛伐克個陣，真係以為佢哋篤定首名晉級咁款。隊長朗尼同迪利阿里冇正選，鶴臣「契仔」韋舒亞同佐敦軒達臣打正選，熱刺雙閘亦齊齊冇得踢，改由尼達利基尼同賴恩貝特蘭擔正，加埋占美華迪同史杜列治，英格蘭呢場作出咗六個變動，半隊唔同咗。
不過改變唔一定好，呢場英格蘭雖然壓住嚟攻，全場射咗28腳，但得五腳中目標，一個入波都冇！韋舒亞好多失誤，占美華迪同貝特蘭都麻麻哋，鶴臣嘅輪換可以話係失敗。雖然最後換番朗尼、哈利卡尼同阿里入嚟，但結果都係同斯洛伐克踢成0:0。因為威爾斯同日贏波，英格蘭只係得次名，16強會對F組次名，話唔定係葡萄牙嚟！
賽後唔少傳媒都質疑鶴臣輪換過激，但佢就反駁話輪換係順應民意箒，「如果大家係要針對某一個球員嘅話，我覺得好遺憾，我覺得韋舒亞踢得好好。踢完俄羅斯場波後，個個都叫我雪史達寧同卡尼，所以我其實只係輪換咗四個人。」鶴臣大讚球隊過去三場分組賽踢得好，場場都壓住對手踢，仲反問記者：「上次英格蘭喺大賽三場分組賽都控制戰局，係幾時嘅事？你哋可能唔覺，但以今日嘅發揮，我哋絕對唔怕任何對手！」
大賽六次PK戰輸五次
雖然鶴臣講到呢隊英格蘭好似天不怕、地不怕咁，但佢總算有啲自知之明，好清楚英軍最怕一樣，就係互射12碼。鶴臣話：「我哋嘅球員每日都有練12碼，但我知訓練同埋喺幾萬人面前射係兩回事，尤其我哋係英格蘭，特別清楚。」英格蘭過去六次喺大賽互射12碼，輸咗五次，包括喺2004同2006年佢哋都試過被葡萄牙淘汰。