平日喺立法會做慣「球證」嘅主席、民建聯曾鈺成，噚日破戒「落場」踢埋波（圖），但泛民議員唔好投訴咁樣係偏頗唔夠中立噃，因為曾主席只係陪住成功喺民記內部獲薦取代鍾樹根排頭位參選港島嘅「企鵝男」張國鈞，去咗跑馬地新月花園探訪晨運人士。
早前聲稱因為自己69歲，年紀太大不宜參選特首嘅曾主席，一落場就表演扭波同的波，似乎仲係好有心有力喎！其實曾主席對黨內派出邊位出戰港島，坊間引述過唔同說法，Tree根就公開話過，曾主席支持佢選港島，但現時曾主席同張國鈞同場踢波，唔見Tree根，呢個球證𠵱家「偏幫」邊個，係咪有啲明顯呢？
獲曾主席「助攻」嘅張國鈞，則大讚曾主席「好腳法」，唔知被民記放棄嘅Tree根，聽到又有乜感想？