銀行客戶認證越來越多花款，好似花旗香港就搶閘推「語音認證」，就咁憑把聲就可以確認客戶身份，唔需要入密碼。噚日花旗就請咗財經事務及庫務局局長陳家強，同一對twins實測系統嘅安全性。
「語音認證」即係透過聲紋確認客戶身份，每個人聲紋都係獨一無二，無論講乜都認到。陳家強噚日亦用中文錄咗一段一分鐘對話，整好聲紋後，就算局長之後講英文都認得出。
至於「扮聲」又點呢？孖生姊妹花Elena同Anne唔單只一樣樣，連把聲都九成似。妹妹Anne試圖扮姐姐認證，但結果完全過唔到關。
除咗聲紋、指紋，仲有乜紋可以認證呢？陳家強就話心跳頻率係另一種生物認證技術，希望銀行將來研究用聲紋外，都可以了解下客戶嘅「心聲」喎，唔知局長有乜心聲想銀行知道呢？