四年一度嘅奧運有幾重要，中國女排主教練郎平會答你：「好重要。」睇佢哋噚日三點幾去紅館備戰世界女排大獎賽香港站就知，原本個半鐘嘅練習加操練到七點。仲有，過去幾年都有安排嘅購物活動今年冇咗，連練習都罕有咁閉門進行，可想而知中國女排呢次勁認真囉。
郎平病癒督操
前日因身體唔舒服缺席領軍嘅郎平噚日終於亮相，雖然佢透過公關話唔接受訪問，但都好有禮貌同小記打招呼，見佢精神唔錯㖭。
郎平上星期喺澳門講過，香港呢一站好重要，皆因三隊對手中，有兩隊係里奧球隊，包括世界排名第一嘅美國同14位嘅荷蘭，呢兩隊仲要同中國同組，今次香港站可以話係最好嘅一次較量機會。中國女排目前排世界第二，佢哋月初第一站大獎賽贏過美國3:1，雖然對手嗰次陣容唔完整，但周五展開嘅香港站賽事，郎平最想壓軸對嘅美國以最強陣容出戰。