騰訊（700）噚日宣佈，斥資670億元收購手遊界一哥芬蘭公司Supercell逾八成股權，到底騰訊點解要收購Supercell？騰訊官方就話因為Supercell夠晒成功，但華華就發現，原因可能仲有一個，就係總裁劉熾平（Martin）鍾意打機。
話說Supercell創辦人Ilkka Paananen噚日透過blog公佈被收購嘅消息，仲貼咗張同Martin搭晒膊頭嘅相，表現得老友鬼鬼。
Ilkka爆料，原來Martin好鍾意玩佢哋隻新game《皇室戰爭》（Clash Royale），一度打到上全球頭100名。估唔到新一代「打工皇帝」Martin咁忙都有時間打機，仲要咁勁。
除咗Martin，小米創辦人雷軍都迷上呢隻game，已經花幾萬蚊人仔「課金」，喺公司同成班高層一齊玩。雷軍之前曾化身「達哥」，直播自己打機㖭。