啱啱過去禮拜日係父親節，圈中唔少星爸喺呢日都享受同仔女天倫樂。不過獨樂樂不如眾樂樂，洪天明兩公婆就約咗錢嘉樂一家、文頌嫻一家慶祝父親節！
除咗後生一堆，洪天明仲專登叫埋老竇洪金寶同媽咪高麗虹出席，實行三代同堂一齊慶祝！
昨日洪天明喺微博貼咗當晚聚會嘅相，先多謝老死錢嘉樂請客，再話自己送咗個電話俾老竇洪金寶，不過最搞笑係，洪天明話囝囝TJ送咗份自製禮物俾佢，仲整到爸爸個樣十足樹熊咁！」
大人有大人吹水，至於幾個差唔多同齡嘅小朋友亦走埋一邊自己玩。到影合照嗰陣，個個細路都企定定乖乖望鏡頭。其實父親節使乜收禮物？望住自己個心肝頂，已經係最好嘅禮物！