女將蔣嘉琦前仗初騎「魅力之子」即彈甩大勝，人馬表現令人印象深刻，不過世事嘅嘢唔係時時都咁順利。上仗嘉琦再策「魅力之子」，竟然大漏閘熱倒落第，賽後馬會立即進行研訊，確定此駒已獲公平出閘，投注冇得回水，認真慘情。
呢日「魅力之子」參試沙田第二組1050米泥閘，係考閘性質接受馬會觀察，鞍上人換咗鄭雨滇，結果冇再扭計起步順利，就此一放到底，貫注力強，以一馬位之先，擊敗「財寶家駒」勝出，季軍是「衝鋒友」。
「魅力之子」今課閘看來既與鄭雨滇合拍，亦顯得狀態大勇，其後馬會公佈此駒試閘及格，可以報名出賽，屆時將會配鄭雨滇抑或用番嘉琦，大家真係要拭目以待了。