韓風吹到港交所（388）！噚日港交所宣佈，同韓國交易所簽訂無約束力意向書，探討雙方嘅股本衍生品可以喺對方市場上市，例如以對方貨幣買賣嘅股票指數期貨期權，或者單一股票期貨期權咁，都在商討範圍之內。
滬港通、深港通就話明解，連商品倫港通都有路捉，霎時間嚟個「窩輪韓港通」，都咪話唔新奇。韓國交易所董事長崔庚洙話，香港、韓國交易時間大致重疊，產品喺兩地互掛上市，就好比買賣本地產品咁，冇大分別。
唔講一國兩制，突然嚟個韓港通，係咪想同今個禮拜剛起動嘅台星通（台灣、新加坡交易所互聯互通）鬥過先？
講開又講，你以為呢兩年追看《星星》、《太陽》就夠潮？其實港交所早就有位Oppa坐鎮，就係加盟5年嘅客戶業務發展及定息產品及貨幣發展主管俞泰碩（Clement，後排左一），上市儀式不時見到佢出沒㗎。