兩位億萬身家的富豪，尋日一早出動，9點去到立法會坐定定為乜？就係要喺旁聽席，聽班官同議員傾的士發新牌同小巴增加座位兩件大事。坐擁超過500個市區的士牌、100幾個新界的士牌嘅「的士大王」伍海山全程好低調，但一路聽到實，冇合眼瞓；小巴大王馬亞木父子到場後，都好認真，邊聽邊傾。佢哋又不時撳電話，唔知係咪send訊息畀下屬，吩咐對策呢？
會後馬亞木父子有同記者講兩句，佢哋覺得政府企得幾硬，加到19座位嘅機會好大。憑一架紅磡去青山道小巴起家嘅馬亞木，有超過600個小巴牌，其實加到19座定20座對佢哋應該影響唔大，近排小巴牌都冇因為呢啲消息有咩變動，都係510萬左右。
不過，的士牌價就慘淡啲，上年去過逾700萬高位，之後一路跌，近日發新牌消息一出，由610萬跌到590幾萬。唔知係咪身價縮咗水唔太高興，伍海山會後即刻鬆人，查實佢爸爸伍熀喺香港土瓜灣以推銷汽車電池起家，之後轉做的士賣買發達，創立泰和車行，成為「的士大王」。伍海山繼承父親個「的士大王」位置，依家市區的士牌照有近600個、新界的士牌照超過150個。佢上年就Uber搶生意去過立法會發言，狂鬧Uber非法車輛載客取酬，構成不公平嘅競爭。